IB投資系列：人棄我取，講股應否投資？

 讀歷史都明白這道理…

雖然字眼上有少少分別，但意思一樣。其實我地都明白股票之道在乎：「人棄我取、人取我棄」，咁點解我地要爭呢？靚女又要爭，明知爭嘅結果是邊際利潤去到零才冇人爭，到時人、財兩失又何必呢？Nvidia升到974美元嘅人，點樣走貨呢？

正所謂：「亢龍有悔，盈不可久也」，事物的盡頭，定必歸回自己嘅反面，物極必反。美股好咗咁耐，自然會衰，咁某些地方衰咗咁耐，會不會變好？各國撤資，你去執平貨？

我以前曾投資過某天朝保險公司，佢今日個價比起我當日買嘅價仲低，價錢係平，但佢嘅前景係點呢？從佢嘅股價已可反映一切，根本買唔落手？

人棄我取，並不是人們棄掉垃圾，你都要執，而是巿場價格比實質價值被嚴重低估情況下，才值得大手掃貨。某些地方，樓房跌、股票跌、人工跌、失業升、國債升、地方債升，但經濟增長有5%，你信咪大手掃貨囉！你信「痕指」三萬點、四萬點，你咪入巿囉！漁村沒有以前嘅核心價值，淪為天朝城巿，估價仲會好似以前咁值租嗎？醒下喇！

（商家佬唔會死錯人，人地早幾年已經部署撒資，正是天朝如日方中嘅時候。當然，唔係個個商家佬都咁醒。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

移英日記（153）與講人食早餐

 由於架豐田Yaris有Apple Carplay，一插入電話，就可用車嘅喇叭及咪，用聲音傳whatsapp信息之類，個仔放學點都要玩，成日講「屎屎尿尿」，部機就會重複咁講，覺得很過癮，點知誤傳俾人，攪到我要致歉，但因為這致歉，打開了話題，原來是移英講人留了電話，但一直無聯絡，於是約了今日跟「歪芺」一齊去英國大眾食堂Wetherspoon食早餐。

一傾之下，原來以前住「羞街」（South Gyle）曾幫一個駕本田Jass的年青人，正是她的兒子，現在已往倫敦工作，原來世界就係咁細，佢話我嗰仔可能係資優，以前佢個仔都係咁，特別難教，直至上大學才甩身，要俾多啲機會俾佢發展及學習，小朋友平凡是福，不平凡也有不平凡嘅路。

我嘅兒子係咪資優，我就唔敢說，但現在已醒目咗，認得車嘅牌子及部分型號，Audi TT佢都認到嘅…

佢話本地嘅人，到了大學，就要佢自己獨立，自己找兼職幫補自己嘅生活，所以子女讀完中學，父母便甩身，仲有十幾年時間，好好珍惜吧！

IB投資系列：特斯拉盤後回升，是否迴光反照？

 當蠟燭臨熄的一刻，人死前的一刻，都會特別生猛，這個短暫轉好嘅現象稱之為：「迴光反照」，特斯拉盤後上升，會否是迴光反照？反映死前嘅一刻？

事緣今季成績急轉直下，股價唔跌才奇？至於機器人的士，要成功真係唔容易，遠水不能救近火，股價自然急跌。

直至特斯拉確認平價細車計劃將加速進行，回應巿場嘅需要，25000美元（19萬5千港元），跟電油車一樣，有相當競爭力。又暫緩印度及墨西哥新廠計劃，專注現時生產線調整，用現有資源去做，對於投資者而言，是絕對收貨，股價自然回穩。

（大行紛紛下調目標價，要小心留意。）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

移英日記（152）人生係一個選擇

 如果有愛情同麵包，你會怎決擇？

可能你也會選擇眼前利益，就算孤獨終老也無所謂。

選擇愛情又不一定可白頭到老。

在人生的決擇上，你永遠唔知結果，只能憑當下嘅條件去判斷、評估，作出決擇。

九七年前移民嘅人，好明顯是走錯咗，明明去了高位，又辭職又賣樓，幾年之後回流，即使做番本行，要叫以前手下做上司，要買番層樓，已經貴了許多，買唔起，要俾貴租，咁樣走一走，唔見一大筆、又降級，都唔知為乜？

六七走嘅人，八九走嘅人，九七走嘅人，全部放棄漁村嘅黃金時代，損失係難以估計，當中不乏有些人要做「太空人」，聚少離多，離婚也不少，都唔知為乜？

現時漁村處境比天朝還差，人們為了示忠、或自保，一定寧左勿右、寧濫莫缺…比天朝更甚，唔夠左都俾人批鬥，係咁嘅環境點會有運行。

究竟幾時會苦盡甘來？物極必反？當去到最壞嘅時候就會扭轉乾坤？最壞嘅情況是否已經過去？自己判斷下吧！

我地投資都要識走位，如果做人唔識走位，點會有運行，永遠有危便有機，你自己問問自己，係咪嗰啲可以上位嘅人，講得出睇完今上本書，全身任督二脈打通咗嘅，就留低吧！大把運行！

（正所謂：「識時務者為俊傑」，學野喇！）

（東瀛人不識好歹，醜化今上。）

（漁村在六七十年代，已經超越自稱有制度優勢嘅天朝，十分尷尬！可惜這個光輝唔係永恆！）

（已有人提出取消漁村嘅外交特權。）

IB投資系列：投資在正確啲事最終都會贏

 人嘅一生總會做錯事，信錯人…

如果買車股，你信豐田章男？還是伊隆馬斯克？

在電車興旺嘅時候，一定係信馬斯克，攻擊豐田章男沒有全力發展電車，但這一刻？正所謂：「路遙知馬力」，揸豐田股票，一定笑呵呵！揸特斯拉股票，一定愁過李莫愁。投資在正確的事，或有短期波動，但最終一定贏錢。

企業領袖的每個決定，都有長遠影響，當日豐田章男沒有全力發展電車，可能是正確。今日馬斯克也面對同樣決擇，發展廉價電車？還是機器人的士？如果要廉價，可以平成點？馬斯克可以用成本價賣車，靠軟件及服務賺錢，但先決條件是自動駕駛已經成功，一日未成功，成本價這一招就根本不可能使出，要平？Model2一定唔夠比亞廸平。

要推機器人的士，首先要自動駕駛已經成功，然後才可用於商業。咁即係一次要行到兩步，絕對不容易。就好像當日SpaceX，明白燃料只佔發射成本極少比例，只要火箭可以回收重用，一定賺大錢，但難度之高，令馬斯克差不多破產，但最後成功。今日獵鷹九號火箭發射費5400萬美元，燃料20萬美元，只佔0.37%，天朝嘅火箭都鬥不了（要6000萬美元射一次）。同樣道理，這個商業模式成功，真係可以「號令天下，莫敢不從」，自動駕駛何止發展機器人的士，機器人貨車、貨櫃車…甚至可以取代晒全球所有司機，估值係無法估計。不過要成功，難度也是無法估計。

（荒舟基金「木頭姐」認為值2000元（現時股價140元），係誇咗少少，因為佢揸咗好多貨。其實投資特斯拉，好似賭大細，賭佢成唔成功，往積不能計算成功率，人亦唔會一世行運，自己執生！）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。

移英日記（151）好地方冇人識欣賞

 股票之道在乎：「人棄我取、人取我棄」，唔好同人爭，爭係無意思。如果啲女咁受歡迎，就隨人地去追，吊高黎賣，代價太大，追到都冇意思，在經濟學解釋，佢嘅邊際價值跌至零才冇人追。移民也是一樣，熱門城巿，搶學位、搶住屋，我都怕怕。

倫敦、曼徹斯特係意料之內，因為有直航機由漁村直達，有錢住倫敦，冇錢住曼城，令我意外嘅是，我嘅居住地愛丁堡竟然不入十大，住屋價格僅次於倫敦，又偏北，怕天氣凍也是講人所懼怕。

移居蘇格蘭講人只有二千多人，基督徒只有二百多人，由於人數少，未對整個社區有很大影響，唔似曼城碰口碰面都係鄉講人，對適應新地方係冇咁好，少了一點安全感。但係太多移民，對當地影響較大，亦會令本地人唔喜歡。

少鄉講人，反而好原汁原味反映整個社會係點，蘇格蘭人對自身民族有高度自豪，故外人要融入反而困難，除非我地嘅下一代，就可以做當地人的工作，低下工作全部都是外來人擔任，去麥當勞就好容易見到南亞人送外賣，我做執房，都是波蘭人、烏克蘭人為主，仲有一個巴基斯坦，一個菲律賓，連埋我這個鄉講人（人地覺得是天朝人），簡直就是聯合國一樣。愛丁堡外人多，見怪不怪，就不覺得歧視，英語唔好或聽唔到口音，用你有限英語跟動作表達到就可以。

買冷門賠率先高，有肉食，這裡我真係未聽過講人子女冇學位，免費由Nursery讀到University，仲想點？細路大咗，佢鍾意去邊咪去邊囉！蘇格蘭有好多好地方，風光無限，傳聞有水怪嘅尼斯湖，要揸三個幾鐘頭車（來回七小時），未見水怪已驚，未敢挑戰。

（有專家認為水怪只不過是大型鰻魚。）

（真係太遠了。）

IB投資系列：美股下跌要小心

 上星期美股嚴重調整…

主要係納指勁跌，除了某電車外，晶片尤其是重災區，究竟是健康嘅回調？還是急跌？實在難以知道。美帝調控息率只考慮通脹因素，不會因股票跌得勁就減息幫下你，所以當俄烏戰爭、以伊交惡等不穩因素，歐美為保護自家工業，一定不容許產能過剩的天朝傾銷，咁通脹情況一定惡化，輕則不減息至九月或年尾，重則更要加息的可能。

對息率敏感嘅科技股，更是雪上加霜，靠AI概念已炒上嘅晶片股固然要回調，係戰爭及息率陰霾下，標普500指數也下跌。

投資最緊要唔好讓自己輸錢，早早設定好價位平倉便算，攞番啲美元，一係閒置美元放IB收4.83%，隨時再搏殺。一係買短期美國國債，賺住5厘息等觀望。一係在價位好兌換非美貨幣，睇淡後巿及美元，視乎你想繼續搏殺？觀望？退巿？

以前股票升、債券跌，股票跌、債劵升，自從經歷股債齊跌，唔見兩球以後，我知股債沒有必然的關係，債券是睇息率，如果通脹不改善，減息空間無望，要升嘅可能便更困難，要落駐就不容易了！

（AI應用日多，對個人電腦需求有潛在增長，以前電腦一哥Intel竟不爭氣，AMD早已迎頭而上，更與聯想合作，蘇姿豐好嘢！）

免責聲明：本網誌一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本人無關。投資涉及風險，證券價格可升亦可跌。